話說我哋識咗個朋友差不多有一年時間，因工作關係，基本上一星期都有四、五日見到，而佢老婆就係識呢個朋友既三個月後突然問我借$6000.00，仲要話唔俾得佢老公知，否則家變都有份，又話五日後會還番俾我，好啦﹗都借咗俾佢，點知五日後呢個女人完全無還錢既舉動，我己即刻打電話俾佢，問佢還錢，點知佢又推搪未收到數，要再過多數日，如是者，連追數星期，仍未還錢﹗最後迫於無奈，唯有直接同佢老公講，好彩佢老公知道後，猛道歉兼還呢筆數，還叫我哋以後有甚麼一定要話俾佢知。此後一路都無問我們借錢，以為無事啦，點知今年初，某一次呢個女人坐完我哋架車，下車之後，我老公部手提電話忽然唔見咗，搵勻成架車都無，我哋已經覺得係呢個女人偷，但苦無証遽，奈佢唔何﹗都算唯有以後打醒萬二分精神，因為我哋一路都有來往，只係佢個人問題啫，無諗過因為佢而唔俾佢個女同老公去我哋屋企玩ga﹗
亦因為咁我哋又差d被呢個女人害多次，話說琴日星期六因為打風，佢個女覺得係屋企好悶，就打電話俾我哋，問可唔可以去我哋屋企同我個仔玩，因為佢呢個女真係好純，我都好歡迎佢，咁佢兩公婆晚上亦過埋嚟我屋企一齊吃飯，飯後呢個老婆話俾番一部份飯錢我，因為個銀包就係我身邊，我又唔想係佢面前打開個銀包，就好隨意咁把佢俾個d錢放係度，佢望咗數眼，就起身攞我個銀包，我即刻問佢你做乜嘢呀？佢就話我點解唔放好d錢入銀包？我當然即刻搶番個銀包，迫住係佢面前打開銀包，之後即刻攞番個銀包放入手袋，再放係電腦枱側，我就諗住成晚會坐係電腦枱前直至佢哋走咗為止，點知真係我算不及佢算我，到咗今朝，諗住帶個仔出門口去學琴，檢查手袋有冇帶漏嘢之時，才發現個銀包唔見咗，搵咗好耐都係搵唔到，咁已諗到會唔會係呢個女人做，即刻打電話俾佢，問佢見唔見我個銀包，哈‥‥佢仲死口話無見過，過後又打電話俾我，話遲少少上嚟幫我搵，仲話用佢個方法搵，一定搵到噃﹗收線之後，我真係好唔甘心，再認真d去搵，終於俾我係洗手間個洗手盆下面去水管個角落位到搵到個銀包，但係入面d錢全部冇晒，呢一刻我真係好嬲，本來同老公商量，橫掂佢都話上嚟幫我搵，仲話實搵到，不如就照放番個銀包落原位捉佢，不過老公就話根本已經唔需要咁做，好明顯就係佢，因為成晚除咗佢入過洗手間，就無其他人，所以我老公即刻打電話俾佢老公，話俾佢知我哋已經搵番，今次仲要好肯定係佢老婆偷，問佢打算點，佢老公聽完之後，又係猛道歉，應承還番錢俾我哋，仲話保証以後唔會再有呢d事發生，因為佢以後會禁止佢老婆再行近我哋架車，或上去我哋屋企。最可笑就係到咗傍晚，佢老婆居然send咗個短訊俾我道歉﹗
睇見佢老公咁，有時都幾同情佢，有個咁既老婆，遲早俾佢害死﹗
